09 March, 2017

கூகிள் அதன் 'கீப்'பை என்ன செய்தது தெரியுமா?


சுருக்கமா சொல்லனும்னா கூகிள் கீப்  {keep.google.com} ஒரு எவர்நோட் {https://evernote.com/} மாதிரியான ஒரு note-taking சேவை.

கூகிள் கீப்பைவிட ஆற்றல் மிகுந்த சேவைகள் இருந்தாலும் அதற்காக இன்னொரு கணக்கு ஆரம்பிப்பதற்கு பதில் கீப்பையே பயன்படுத்திக்கொண்டு இருக்கிறேன்.

என் கணிப்பில் 'இது பரவாயில்லை'.

இலவச சேவையான கீப்புக்கு அப்படி ஒன்றும் பெரிய வரவேற்பில்லை என்றாலும் கூகிள் இதை கைவிடாமல் பராமரித்துக்கொண்டு வந்தது.

கூகிள், பிப்ரவரி 2017-ல் கீப்பை தன் ஜி-ஸ்வீட் கட்டண சேவையின் {gsuite.google.com} ஒரு அங்கமாக சேர்த்துக்கொண்டது. இதனால் நமக்கு எந்த லாபம் இல்லையென்றாலும் ஜி-ஸ்வீட் கட்டண சேவையை பயன்படுத்தும் நிறுவனங்களுக்கு இது கூடுதல் வசதிதான்.

நீங்கள் மைக்ரோசாஃப்ட் வேர்டுக்கு பதில் கூகுள் டாக்ஸ் {docs.google.com} பயன்படுத்துபவராக இருந்தால் அவசரத்தில் கீப்பில் கிறுக்கியதை டாக்சுக்கும், பொறுமையாக டாக்சில் எழுதியதை கீப்புக்கும்,  இழுத்துக்கொள்ள முடியும்.


இந்த குறிப்பிட்ட வசதி கீப், டாக்சின்  இலவச சேவைகளிலும் வேலை செய்கிறது.

குறிப்புகள் எழுதுவது, பட்டியல் போடுவது, ஞாபகப்படுத்துதல், பேசப்பேச அதை எழுத்துகளாக மாற்றிக்கொடுக்கும் வசதி, படத்தில் இருக்கும் எழுத்துகளை பிரித்தெடுக்கும் வேலை இப்படி பல செயல்களுக்கு நாம் கூகிள் கீப்பை பயன்படுத்திக் கொள்ளலாம்.

கீப்புக்கு ஆன்ட்ராய்ட் அப், ஐஓஎஸ் அப் இரண்டும் இருக்கிறது.

உலவி வழியாகவும் பயன்படுத்திக்கொள்ளலாம்.

07 March, 2017

ஜி-ஸ்வீட் ஜிமெயிலின் "வரும்.. ஆனா போகாது" சலுகை!

சமீபத்தில் கூகிள் நிறுவனம் ஒரு செய்தி வெளியிட்டிருந்தது.

அதாவது ஜிமெயிலில் உள்வரும் மின்னஞ்சல்களில் இணைப்பு கோப்புகள் இருந்தால் {அட்டாச்மென்ட் ஃபைல்ஸ்} அந்த இணைப்பின்/இணைப்புகளின் அனுமதிக்கப்படும் அதிகபட்ச அளவு {ஒரு மின்னஞ்சலுக்கு} முன்பு இருந்த 25 எம்.பியிலிருந்து 50 எம்.பியாக அதிகரிக்கப்படுவதாக சொல்லியிருந்தது.

இதில் உள்ள நுணுக்கத்தை கவனித்தே ஆகவேண்டும். {சாதாரணமாக} 50 எம்.பி வரை கோப்புகளை இணைத்து ஜிமெயில் பயனி ஒரு மின்னஞ்சலை பிறருக்கு அனுப்ப முடியாது {பெறுபவர் இன்னொரு ஜிமெயில் பயனியாக இருந்தால்கூட!}. ஏனென்றால் வெளியே போகும் ஜிமெயில் மின்னஞ்சலின் இணைப்பு கோப்புகளின் அதிகபட்ச அளவு பழையபடி இன்னும் 25 எம்.பியாக மட்டுமே இருக்கிறது.

வேறு யாராவது அப்படி அனுப்பினால் பெற்றுக்கொள்ள முடியும். அவ்வளவே.

25 எம்.பிக்கு மேல் அளவுள்ள கோப்புகளை இணைப்பாக அனுப்ப வேண்டும் என்றால் ஜிட்ரைவின் {drive.google.com} உதவியுடன் {லிங்க்காக} அனுப்ப வழிமுறை இருக்கிறது.

மேலோட்டமாக பார்த்தால் இந்த கூகிளின் அறிவிப்பு எல்லா ஜிமெயில் பயனிகளுக்கும் பொருந்தும் என்று சிலர் நினைக்கக்கூடும். ஆனால் உண்மை அதுவல்ல. ஏனென்றால்  கூகுளின் "ஜி-ஸ்வீட்"டுக்கு காசு கொடுத்து ஜிமெயிலை பயன்படுத்துபவர்களுக்கு மட்டுமே இது பொருந்தும் {Gmail users under Gsuite paid service https://gsuite.google.com/} .

இலவச ஜிமெயில் பயனிகளுக்கும் இது பொருந்தும் என்று கூகிள் எங்கேயும் சொல்லவில்லை. கூகுளுக்கு விருப்பம் இருந்தால் ஒருவேளை இந்த சலுகையை இலவச ஜிமெயிலுக்கும் நீட்டிக்கலாம். ஆனால் உறுதியில்லை.

இலவச ஜிமெயிலிலும் இந்த சலுகை அறிமுகம் ஆகிவிட்டதா?  என்பதை பார்க்க நமக்கு நாமே 25 எம்.பிக்கு மேல் அளவுள்ள இணைப்பை அனுப்பி பரிசோதித்துக்கொள்ளலாம்.

அருஞ்சொற்பொருள்:
Passenger = பயணி {பயணம் செய்பவர் பயணி}
User = பயனி {பயன்படுத்துபவர் பயனி}

back to top